Spannend för Isatzchräft
Wieso met Emotionscode loh behandle?
I öisem Bruefsautag as Isatzchräft semer hüüfig met Situatione konfrontiert wo i verschedenster Hiisecht chönd belastend si. Ganz bsonders ou emotional. Einersiits ufgrond vo de tatsächleche Tragik vomene Ereignis, aber ou wöu as professionelle Häufer (wies jo emmer so schön usdröckt werd) eifach – egau wie – emmer muesch fonktioniere ond settsch handligsfähig bliibe. Das esch jedefaus das, wo vo öis Isatzchräft erwartet werd. Zom das gwährleiste düemer ned säute öisi eigne Emotione zemli fescht onderdröcke. I dem Momänt esch das definitiv e gueti Strategie ond erfahrigsgmäss ou e Strategie wo meistens rächt zueverlässig fonktioniert. Aber schlossändli send ou mer eifach nor Mönsche! Mönsche met ganz huufe Emotione wo wette ond wo vor allem sette gläbt wärde wemer ned plötzli säuber wönd ergendwelchi körperleche oder psychische Problem öbercho.
Gspröch met guete (Arbets-) Kollege oder met usböudete Peers häufed öis debi zom so Erläbnis z'verarbeite. Aber d’Emotione bliibe trotzdem sehr hüüfig. Das merke mer de wemer:
-
die gliche Lüüt vo Partnerorganisatione weder ufeme andere Isatz xähnd
-
wenn weder e ähnlechi Isatzmäudig ufem Pager ufploppt
-
weder im gliche Dorf, im gliche Quartier oder i de gliche Stross anes Ereignis müend
Jedesmou wemer dörefahre – egau öb gschäftlech oder privat – esches weder presänt. Das dafs ou si ond werds emmer si. Die Erläbnis ghöre zo öisere ganz persönleche Gschecht dezue ond möche öis schlossändli ou zo dem einzigartige Mönsch wo mer send. Aber wörds de ned länge, wenn eifach d’Erennerige a die Ereignis no ome send ohni as jedesmou weder die erdröckende Emotione i eim ufechöme? Aso ech persönlech säge ganz klar doch das wörd länge! Ech be definitiv de Meinig, das met de Emotione muess ned si! Drom lohni mech sed einiger Ziit noch so belastende, tragische Ereignis genau met dere Emotionscode-Methode loh behandle. Ond zwor möglechst onmettubar – aso secher ennerhaub vo 24 Stond – noch some Ereignis. Ond ech merke as ech sethär werkli besser met so Sache cha omgoh wöus mech eifach uf de emotionale Äbeni nöm so fescht ond vor allem nöm so lang duet belaschte. S'Ganze fühlt sech liechter a. För das beni sehr dankbar. Wöu das ases met de Johre eifacher werd met so Ereignis omzgoh hed sech bi mer leider as Wonschdänke usegstöut. Ech weiss ned, aber eventuell chond ou der das bekannt vor? Das liid a de Tatsach as sech de persönlech Rocksack – ou wenn no so vöu Erfahrig hesch - met jedem tragische Ereignis betzli meh met Emotione föut.
Ech be mer sehr bewusst ases schwerig esch sech as starche Führwehrmaa, as erfahrne Rettigssanitäter oder as Polizest wo vor nüd Angst hed, uf sone Behandligsmethode oder ases chli sympathischer tönt, uf sone Verarbeitigsmethode izloh. Aber ech chas der werkli sehr empfähle zom’s usprobiere ond gloub mer, du besch wäg dem kei schlächtere Bruefsmaa!
Natürli göutet das Agebot genau so för alli starche, erfahrne ond muetige Bruefsfroue. Aber erfahrigsgmäss bruche die zom sech mou uf so öppis izloh ned ganz so vöu Zuesproch wie öisi herte männleche Bruefskollege. Sorry för dä Jungs, aber tragischerwiis esches haut ou im 21. Johrhondert emmer nochli so!
Öbrigens hani ou Bruefskolleginne (jo wie xeid d’Manne hend leider nochli meh Müeh sech uf das izloh) met teilwiis johrelanger Erfahrig im Rettigsdienst, wo genau wie ech, us eigeter Erfahrig totau öberzoge send vo dere Methode.
So fonktionierts
Du mäudisch dech metere chorze Text- oder Sprochnochrecht bi mer met dim Name, Vorname ond Gebortsdatum ond teilsch met as e för DECH belastende Isatz gha hesch. Meh Infos bruchi ned – drom zöut jetz ou d’Usred wägem Dateschotz leider nöm! Sorry!
De mach ech ennerhaub vo 12-24 Stond die ersti Behandligssequänz a der ond die zwöiti Behandligssequänz denn zwöi bis vier Täg nochem Ereignis. Ond das esch scho alles.
Das alles passiert öbrigens as sogenannti Färnbehandlig, aso ohni as du ergendwo muesch dörecho, öber ergendöppis rede oder was ou emmer.
_edited.png)
