Tatsächlech beni scho sed baud zwänzg Johr im Xondheitswäse tätig. Zersch as Chrankeschwöster – jo ech weiss hötzotags sett mer dem schiins nöm so säge, aber wär mech könnt weiss, as mech Sache wo «mer» ned sett erstens no säute sonderlech beidrockt hend ond zwöitens mech ned dra hendere zom’s trotzdem (oder erscht rächt) mache. Wöu wär gnau esch das Wäse wo s’Rächt hed z’entscheide ond vorzschriibe was «mer» daf ond was ned? Semer ned alli aut gnue z’entscheide was för öis stemmt ond sech rechtig afühlt ganz onabhängig devo was d’Erwartige vo de Gsöuschaft send?

​

Zrogg zo mer, zwöscheziitlech schaff ech sed fasch zäh Johr im Rettigsdienst. Ech be aso, öb i wott oder ned, absolut prägt vo de Schueumedizin. Dorne Arbetskollegin, wo zwöscheziitlech ou ganz e gueti Fröndin vo mer esch, beni aber vor paar Johr ou met anderne Methode i Kontakt cho. Met einige vo dene hani mi säuber loh behandle. Debi hani huufe werklech tolli – wenn ou förnes Schueumedizinherni ned emmer ganz nohvouziehbari – Erfahrige döffe mache. Erfahrige wo mer einersiits ghoufe hend offener z’si för Nöis, aber mer anderersiits ou hend chönne häufe bi Beschwärde wo d’Schueumedizin ned erfougriich xi esch.

​

Bsonders spannend hani die ganzi Sach met de Energieheilig, aso i mim Fau met em Emotions- ond Bodycode gfonde. Ech werde ned aglängt, muess ned mou i de Nöchi si vo dere Person wo mech behandlet ond trotzdem merki huufe wonderbari Veränderige. E Verbesserig oder es Verschwende vo körperleche Beschwärde aber ou as mech gwössni Situatione im (Bruefs-)Autag plötzli nöm so stressed, mech nöme löhnd loh explodiere oder mech sösch negativ beiflossed wie früehner. Ech ha mer das ond deses säuber biibrocht ond schnöu gmerkt wie vöu Fröid ases mer macht, mech säuber, aber ou anderi chönne bi verschedenste Beschwärde z’onderstötze. Bsonders spannend hani gfonde wie guet Chend met dere Methode chönd behandlet wärde. Drom hani mech de dezue entschede d’Usböudig as Emotionscode-Awänderi z’mache.